決戰《強國夢》｜玩Game建國咁簡單？夫子Vs 桌遊達人中國恐成最大輸家 - 香港蘋果日報

karitosas.blogspot.com

中國board game《強國夢》是近月新華書局宣傳習近平思想的文創大作，亦是首部有官方背景出版的政治board game。本報近日購得一部《強國夢》來港，並邀請了接觸中國政情40年的國情專家「夫子」劉銳紹，以及有15年玩board game經驗的「樂瘋桌遊」負責人Jacky試玩。遊戲的中國政治問答題竟考起夫子，最後答錯數題，他笑說：「合理喎，非常高興添呀，因為我係正常人嘅腦去了解中國國情。」他發現遊戲只重視死背中共認可的政治及歷史：「如果我推薦呢個遊戲畀年輕人玩，我一定俾後生仔打！」《強國夢》只是「強國發夢」。

《強國夢》可由2至4人玩，遊戲分兩大部份，首部份是「文化階段」，玩家抽取中國問題作答，大部份都是政治題目；第二部份是「發展階段」，玩家利用手上「發展卡」來建設自己勢力。兩階段的成績均影響玩家的「幸福指數」，幸福指數最高者為勝。Jacky認為《強國夢》屬於大型board game，遊戲硬件做得不錯，售價200港元是相當進取，同等規模的遊戲售價約300至400港元。

Jacky認為遊戲最大特色是問答部份，但最大問題亦在問題部份：「題目嘅難度好高，真係要愛國愛黨先答到，我就差啲啦。」從遊戲設計來看，「識答中國問題係有好大優勢，不過玩多幾次熟晒啲題目，佢嘅重玩性就好低。」他諷刺說：「喺《國安法》嘅影響之下，我可以畀5分合格分數，以免俾人查水錶。」他其後認真解釋：「一般好玩嘅遊戲都要有一種互動，競爭性要多啲，但《強國夢》競爭同互動唔多，可能佢想切合國家和諧嘅路線，唔想有太多競爭，反而想大家多啲合作。」

夫子在1973年入行擔任記者，用47年接觸及認識中國，但《強國夢》的問題仍然考起他。其中一條問題問道：「黨執政後最大危險是_____？A. 驕傲自滿 B. 固步自封 C. 缺乏創新 D. 脫離群眾」，夫子二話不說搶答：「全部都係！」夫子最後任意挑選出C，但答案是D。夫子在遊戲答錯題目，但笑言不介意，反說：「非常高興添呀，因為我係正常人嘅腦去了解中國國情。」他認為遊戲竅門就是答對中共問題，但問題可供選擇的答案模棱兩可，幾乎所有答案在常人角度都是正確，「佢（《強國夢》）唔係鼓勵思考嘅，佢係要你跟隨黨嘅答案，這些答案連國內人士都未必認同，生記死背答案嘅部份太強烈，完全係中國特色囉，領導人講嘅嘢就係啱啦！但領導人今日講嘅嘢，之後都可能否定返自己㗎喎！」

現時國內已有大學舉辦《強國夢》大賽，以此作為思想教育。冠軍玩家稱：「在遊戲中感受到滿滿的正能量和幸福感。」問到夫子會否推介這款遊戲給年輕人，寓教於樂，他立即耍手擰頭：「如果我推薦呢個遊戲畀年輕人玩，我一定俾後生仔打！」

《蘋果》記者

手機用戶請按此：《強國夢》遊戲題目

-----------------------------

《蘋果》英文版免費試睇：了解更多

英文版已登錄《蘋果》App，立即下載/ 更新：iOS / Android

-----------------------------

支持蘋果深度報道，深入社區，踢爆權貴，即Like蘋果專題及調查組FB專頁！

Let's block ads! (Why?)

November 11, 2020 at 05:20PM
https://ift.tt/3lzMTo1

決戰《強國夢》｜玩Game建國咁簡單？夫子Vs 桌遊達人中國恐成最大輸家 - 香港蘋果日報

https://ift.tt/3hBwT39